كلماتكلمات تراك
كلمات تراك العقد الجوكر مكتوبة كاملة 2018
ملحوظة : اذا تم توجيهك الى موقع اخر غير موقع التحميل قم بالرجوع مرة اخرة واضغط على رابط التحميل وسيتم توجيهك الى موقع التحميل الحقيقي
كلمات تراك العقد الجوكر مكتوبة كاملة 2018
أكيد كان ليها حلول
وأكيد مننا في طرف مسئول
كان سهل النهاية تبقى نقطة بداية
لو سعينا لحل وسط معقول
في طرف استُنزِف اهتمامه
وطرف مشافش إلا نفسه قدامه
طرف كان بيخسر ، والسكة مش بتقصر
يوميا بيدفع تمن إدمانه
كنتي كل حاجه عكسي وبتشدني
قبلت عشانك أتهد ، وشخص تاني يتبني
اتغيرت .. على أمل تتغير يوم لما تحبني
قال يعني الريح هتبقى نسمة لو الشجر ينحني
عشت معاكي فرحة .. معيشتش من آخرها
انتي كل ذكرى ببتسم لو افتكرها
في حاجات -وانا بحكي عنك- الوجع يقولي أنكرها
يسألني الحنين: وتحكي ايه؟ .. محيلتكش غيرها
الهجر .. مُر اللوم .. طول الليل .. صعوبة النوم
تُقل الحمل .. بُطء اليوم .. وسع الفجوة .. ضيق الكون
مكالمة صلح في انتظارها تقلت الثواني
كل إتصال جريت عليه ، وطلع من حد تاني
عاملة مش مضمونة .. مـ اللحظة الأولى
عشان أسعى إنك تفضلي موجودة
وأضحي .. من غير ما أسأل ده في مقابل ايه
انتي عايزة حد تكسريه .. مش تتسندي عليه
أكيد جبت آخري لسبب
مفيش إحساس مـ العدم
اخترت معيشش في ندم
مادام كده كده في ألم
ماهو مش معنى إني قبلت تفتري
مش منطق تبيعي وأشتري
نَفَسي بيطول لو أتغري
لكن جريني في طريق يتجري
رُب قَشةٍ ضاقَ لها الصدرُ اتساعا ً
فهوى كُل شىءٍ كحباتِ العُقدِ تباعا ً
من ساعتها بكابر ، وبكبت المشاعر
مضغوط –من غير ضغوط- عشان بعافر
عشان صلب أبان .. كإن الصعب هان
كإن لوح التلج –انا- مفيش جواه بركان
انتي فضلتي تزيدي الحمل لآخر نفس فيا
واللي أجبرتيني إني أرسم شرخ في الخلفية
سيبتيني وسط وادي الموت ماسك في كوم حجارة
ورافع عملتين الرشوة لقائد العبارة
لو حياتك وقفت .. كان الوضع اتغير
لكن سرعة شفاكي .. خليتني أبان صغير
مش قالوا نور اليوم بيدخل من شروخ الأمس
آدي الشروخ في كل سم .. فين الشمس ؟
أكيد جبت آخري لسبب
مفيش إحساس مـ العدم
اخترت معيشش في ندم
مادام كده كده في ألم
ماهو مش معنى إني قبلت تفتري
مش منطق تبيعي وأشتري
نَفَسي بيطول لو أتغري
لكن جريني في طريق يتجري
في الأول والآخر ده نصيبنا
ارتاحنا وتعبنا .. فرحنا وزعلنا
بعدنا ورجعنا .. اشتاقنا وزهقنا
كان نفسي تبوش مشاكلنا
مـ الأول قولتلك حياتي صعبة .. قولتي ميل
حكيتلك عـ الحمل اللي شايله .. قولتي معاك هشيل
كنت فاكر إني لقيت الضهر ، وإني لقيت شريك
ومصدقتش إنه طُعم وانا بتشد مـ المحيط
فجأة النفس يضيق ؛ فبنراجع نفسنا
يادوب غمضنا لحظة .. إزاي وصلنا هنا
يادوب عدينا غلطة .. معديناش كل ده
يادوب طاطينا مرة .. إزاي اتداسنا كده
فـ انا بلومك من غضب انا فيه
كنت شايف عندك أكتر عشاننا تعمليه
كنت شايف استهتارك باللي بيننا بيزيد
كنت شايف ورد بيدبل ورافضه تسقيه
أكيد جبت آخري لسبب
مفيش إحساس مـ العدم
اخترت معيشش في ندم
مادام كده كده في ألم
ماهو مش معنى إني قبلت تفتري
مش منطق تبيعي وأشتري
نَفَسي بيطول لو أتغري
لكن جريني في طريق يتجري
